¡AHÍ VIEN...!

¡AHÍ VIEN...!

 

— ¿Edá? —entrugó’l comisariu espacientando.

— Cincuenta y ocho. En mayu los cumplió —contestó embeláu‘l forense que, enclicáu, caciplaba na documentación del calabre.

— Daqué talludín —baxó la voz de la qu'averó a la oreya del peritu— pa traxinar la raposina —y llevantó sorriyosu la ceya derecha, dando güelpín de cabeza pa señalar a una muyer moza y rubia, de belleza esllumante, confecha en proporciones, tipu nórdico y ropaxe caro; con esi aquél indefinible de pilforra de lluxu que, cabo’l muertu, atendíen los sanitarios

— Pueque caún tienga lo que merez...—arrepostió tarazante’l forense, que nun quería siguir la corriente al comisariu. Con remosque, el necrólogu empinó de la qu'espetaba un "¡Visto!"

 

-----------------------------------------------------------------------

-1-

            Nun fai falta dicir que les perres son el sangre del sistema. Lluisín sabíalo perbien dende que mozu , na milicia forzoso, tenía de comprar la llibertá de los fines de selmana cumpliendo, per adelantao, les guardies de los que les teníen. Les perres, s'entiende.

            Aparentemente, la milicia dexólu resabiao y folguetu pa eso de doblar el llombu. Nada como tar nel fondu d'un pozu pa decatase de lo alto que ta la llume y, quien diz llume, diz l'escape. Nesti casu el pozu yera la probitú y la llume aquello que la francía dafechu: los cuartos. Asina que colos papeles de tener cumplio el deber pa cola fosca patria que nun elixere (y pola que naide nun entrugaba) viose otra vuelta de civil, lo cualo yera lo mesmo que dicir ensin ranchu. De la qu'esperaba garrar el tren pa volver a la Tierra del Felechu, gracies al pasaporte militar, decatóse de les munches revistes que falaben d'una cosa que tenía visto y oyío pero que nun-y llamare l'atención. Non, t'agora. Paró nel quioscu pa escaciplar dientro d'una d'elles. Lo normal pa elli yera masuñar les de muyeres allegres y contautos sexuales pero, nun sabía porqué, esta vuelta la mano foi a l'atopu d'una d'aquélles mensuales, de munchos collorinos, que falaben d'informática "de consumu", d'una cosa misterioso: el pecé, y coses de programación, too ello invocando un misteriosu llinguaxe de bruxería maquinista que se dicía "cepeme", que facía más humano la "fala" cola máquina. Falaben de programes que facíen maravíes y xuegos de computaor que gûei fain sorreir. Y d'anuncios publicitarios, Ún d'estos calcaba les bondaes d'una ufierta que fadría la vida muncho más fácil: la d'un ordenaor, con impresora matricial incluío y por mui pocos duros.

            En ciertos mundios, y sistemes cronolóxicos, un quinqueniu ye una etenridá. Por daqué qu'esmuz a la ciencia terrestre, el tiempu, talo como se conoz davezu, tien efeutos dixebraos acordies cola psique de quien lu procesa. Lluisín tenía esa particularidá: nelli el tiempu yera muncho más prestamosu de lo que ye normal notros. Asina, aquél vagu y badanes que, de xuro, nun diba tener otru fin que ser pañaor d'ayuda y salariu sociales (depués d'escosar comenientemente la caridá público) en menos de cincu años fíxose espertu en conseyu informáticu. Lo que nun "normal" tomaría raigaños depués de muncho en Lluisín yera cosa d'hores. Por eso, tres aquel tiempu de xubir les parés del pozu, la lluz desllumólu dafechu al arreblagar el bocal qu'amparaba de cayer na furaca. Aende fuera lu esperaba l'ésitu en forma de coordinaor d'equipu de computación d'altu nivel nuna filial d'empresa norteamericano. Por fin les perres entraben-y a embute. Ya nun tenía que comprar la llibertá. Agora podría, si quería, vendela. Y vendiola. Caro.

            Viaxó per tol mundiu llibre por cuenta la empresa. Hai que lo dicir asina porque, d'aquella, el mundiu dixebraba en dos bandes que, de mano, andaben a la tema. Yeren dos conceiciones aparentemente inmecibles, caúna de les cuales yera la bona pa quien la sofitaba. Lluisín pronto pescanció'l raigañu sofista de la situación. Malpenes necesitó curtiu calumbu nel tueru del problema pa desendolcar una ecuación binario que dexaba a les clares la incosistencia social d'aquellos mundios aparentemente disxuntos. Como siempres, vio que la cosa diba de perres. Y quien diz perres diz, a la llarga, poder.

            Sicasí, d'aquella el mundiu yera más cenciello. Les diverses teunoloxíes añeraben en poques manes y los dueños de les manes tarrecíen tantu al otru, al enemigu, que se guardaben muncho de tener al algame d'elles el botón del xuiciu final. Pues, en realidá, como sabía Lluisín, too yera un xuéu. Un gran xuéu que se desendolcaba énte les entendederes aborricaes del restu de la polación terrestre. Cuando Lluisín pescanció esto, ello ye, la naturaleza ludópata de los poderes fácticos que, ente otres coses, pagáben-y'l salariu, afayó muncha meyor concencia pa xugar, elli tamién, aquella inacabable partía d'axedrez, o de dominó, masque a Llusín paicía-y más el xuéu de la oca con un fin inalgamable. impescanciable, indefinible.

 

El primer movimientu foi na Karl Miles Strasse, una escura cai del caleyar de Pankow, nel Berlín oriental. La ficha foi una prestosa mocina, estudiante, d'arte moderno dixo, que se brindó a acompañalu hasta l'hotel qu'habitaba na Alexander-Platz depués d'aburrir, cuala ostra cantábrico, xubiendo y baxando pela gran, y soviéticamente desanxelada, Karl Marx Allé. Nun se decató de lo bien que falaba inglés. Solo vió unes bones tetes y unes piernes d'escándalu. Afamiáu de carne femenino, nun-y fixo falta muncho esparabán pa dexase llevar peles húmides y solombriegues caleyueles del Pankow torgáu y, muncho menos, entamar los empicipios que, de xuro, llevaríen a los dos a la cama de l'alcoba 23 del hotel, solo pa estranxeros y compañía autorizao. Pasóse pel forru el protocolu d'autoproteición del directivu en viaxe a los paises del este d’Europa. La cosa yera “follar una comunista” pensó pues ¿qué otra cosa podría facese nun curtiu descansu de trabayu naquella parte del murniu Berlín desahuciáu?

El segundu, foi un clásicu de la Stasi, el serviciu de seguridá del estáu democráticu alemán. Un paquetín mui cocoquetu, empaxelao con mui bon gustu, que'amás de llevar un escelente vinu alemán (si ye qu'Alemania pué prresumir d'eso) portaba les fotos del atopu sexual cola comunista. Nun podía quexar de lo bien qu'apaicía xingando a la guapa moza, rubia y tremendosa. La verdá ye que pasólo bárbaro y los dos quedaron a gustu.

            Lo cafiante del asuntu nun yeren les fotos sinon la hipocresía. Aquéllo qu'alimentaba al sistema y que facía, amás d'imperdonable, imposible el qu'un altu directivu ocidental de la industria informático toviere relaciones estramaritales. Y ello ensin dicir que la compañía yera una pilforra, amás, comunista. Una carta esclariaba qu'aquello nun tenía porqué ser malo malísimo, que la cosa podría ser mui beneficioso pa toles partes. La carta nun dicía de qué partes se trataba, pero yera claro lo implícito: un billete d'avión de Lufthansa con destín a Berlín venía grapao con billetes del Bank of America por valor de mil dólares. D'aquella, mil dólares yera una cantidad mui curiosa. Cuando la ficha de Lluisín cayó na casiella de la ponte túvolo claro. "De ponte a ponte y sigo l'agua de la fonte", dixo pa sigo de la qu'arreblagaba a otres fiches, adelantando un bon cachu na partía que xugaba al mundiu.

 

El terceru vieno na casa matriz de la empresa. Dende la milicia, na que Lluisín guiaba un tusiente CJ cuando lu dexaben, tenía fixación polos toutarrén. Na Tierra del Felechu los autos que merecíen aquel nome reducíense a (cara) chatarra xaponeso y al café con llechi del Land Rover. La Unión Soviética esportaba un enxendru que llamaba Lada Niva, en realidá un tratorín vestío de Fiat. En fin, too en xunto, una mierda. Nada comparable col material norteamericano. Un poco gastizu en combustible, sí, pero ferramienta de primera. Por eso, cuando estrechó la mano del amu del negociu que lu alimentaba y ésti apurrió-y, mui sorriente, les llaves d'un Ford Frontier, regalu de la casa polo guapu que yera, l'orgasmu qu'esperimentó llevolu a espalmar como botella de xampán nuevo. Malpenes pudo disimular la chirlotada que-y empielgó na bragueta. Nin con mil vírxenes correríase asina.

            Aquel Ford, con permisu y vara alta pa circular y metese en tolos talleres y divisiones de desendolcu informáticu de la empresa, llevolu fasta Milestone, nel condáu de San Juan de Capistrano (espurría ye la buelga de les fundaciones de los colonizaores franciscanos nes Californies). Ellí, na división de programación, maravielló cola teunoloxía de vanguardia en computación polifilar y, na división de materiales, col entamu del diseñu del revolucionariu procesaor 80-88: la xoya de la empresa. El destín d'aquella maravía nun diba ser, satamente, el "personal computer" que tantes perres taba dando al negociu. El "panoyu azul" (alcuñu despeutivu que daba la competencia a aquella compañía que quería monopolizar el mercáu mundial del procesu de datos) mangaría aquel cosu nun misteriosu proyeutu gubernamental del que namai tuvo acesu al acrónimu.

            Entrín el xuéu siguía, la pilforrina, venía a amante, unviaba-y cartes uquiera que diba. En tolos hoteles en qu'agospiaba esperábalu un paquetín de caro arume a rosa xabaz, claramente de manufechura femenino, que siempre-y apurríen con sorrisa de conserxe o mancebu. El serviciu postal de la Stasi yera mui eficiente. Naquelles cartes, enceses d'amor carnal, pasión lisérxico y gozos en solombra, la neña escribía con tinta de dólar, pingando órdenes, dicires y deseyos. Lluisín debía xugar bien colos deseyos. Tenía de cuidase de que nun xubieren de gráu, que nun camudaren n'allampamientos. Como'l gráu alcólicu, el mayor altor d'un deséu tamién anubre les entendederes. Xugando la partía de la vida nun-y convenía perdese na llamarga de la pasión. Lluisín lo sabía y sabía cómo xugar la ficha.

            Mandó que-y dibuxaren un algaire nel capó del Ford. Y otru, con pose más montés y bravén, na portiella trasero. Ellí atrás, cabo la rueda de repuestu, el dibuxu quedaba divín.

            Y cuando la ficha del xuéu cayó na oca, sorriente repitió'l ritu de quien se sabi tocáu polos dioses de la fortuna, cualesquiera que seyan. D'oca a oca, adelantó cincu puestos. Cincu años antemanó la conocencia soviético nel diseñu d'un nuevu tipu de misil que los norteamericanos yá prebaben nes secretes istalaciones del salmoriosu desiertu de San Jacinto. "Cruising" llamábenlu ellos. Los amigos, los otros, prefirieron apellidalu "ss" amestándo-y un númberu. Nunca supieron los norteamericanos qu'aquellos güeyos d'algaire enfocicáu, aquéllos que paicía que clisaben nún la mirada, bramente agüeyaben pa otru sitiu: pa la rueda de repuestu. Dafechu que yera un sitiu amañoso, y inocente, en que meter un microfilm. Piraván yera Lluisín.

 

-2-

El cuartu movimientu foi na gorgolexante y flamante República Sudafricano del presidente Verwoerd. Aquel foi un envite, realmente, mui trabayero.

            D'aquella, l'encesu amor d'Erika ya nun compensaba la tristura de somorguiar nel ambiente d'esbarrumbe que se vivía na Alemania Democrático y, pa qué engañase, ensin amor follar por follar nun traía cuenta cuando les carnes de la dama amostiaben. El xuéu nun diba con ella. Yera prescindible y asina lo vio la Stasi cuando-y preparó a Mary Ann Klerk, mocina de pura raza ario.

            Ayudó muncho a ello el que la empresa de Lluisín punxera los güeyos nel mercáu sudafricano. Europa ya taba atropada comercialmente y los blancos d'aquella república queríen modernizalo too. Y nel "too", creyeilo, había muncho que modernizar con teunoloxía de computación.  D'otra banda, la Unión Soviética espurría los tentáculos n'Angola gracies a los molacinos cubanos y Mozambique tamién yera parte del xuéu gracies al anunciáu esbarrumbe colonial portugués. Mas pa los blncos afrikáner aquel xuéu nun yera el de la oca sinón el de les dames: pieces blanques escontra prietes. Y ellos allampiaben por una solución final. Y teníen oru y diamantes a embute pa, sinon costruila, sí comprala.

            Masque avezao a la bona vida y a les meyores istalaciones hoteleres de la norteamerica trunfante, Lluisín plasmó cuando ocupó la suite presidencial del hotel Chistiaan Orange en ciudá del Cabu. Podría dicise que yera indecente aquél lluxu pero nun yera nada lo que viere primero porque, cuando más embobó foi al decata de que'l dorao de columnes y parés yera, dafechu, pan d'oru d'un gordor que nunca nun viere fasta entós. Tolo metálico yera d'oru, o lo tenía incorporao. Y del techu, selemente cañicaes pola corriente d'aire acondicionao, tingalexaben señoriales arañes de cristal que, daveres, yeren de diamante.

            En realida too yera poco p' agasayar al vicepresidente de la empresa, responsable de los mercaos d'Africa y l'Asia emerxente. Y, pa descansu y fuelgu del guerreru de Wall Street, la guapa Mary Ann alguardaba na imensa cama xiratorio. En viéndola, Lluisín preguntóse el porqué de que a los alemanes comunistes-yos gustare tanto aquél tipu femenín que siempre-y proponíen: rubia, alta; fina, mas membruda, con esi aquel de pureza ario, bien servía de mamielles con tetines piqueres.

            Naquella Sudáfrica la vida yera mui llevadero. Por cuatro cuartos podíes tener a toa una tribu al to serviciu. Eso violo cuando foi de safari a Mozambique invitáu pol dueñu del distritu de Mapai, un portugués de Cascais que falaba maravíes del orde y la disciplina que reinaba en Sudáfrica. En realidá, aquella parte de la raya, dientru territoriu de la colonia portuguesa, yera de facto un protectoráu sudafricanu qu'apurría manu d'obra esclavo a les mines de los afrikáner mientres el gobernaor portugués, y la metrópoli, miraben pa otru llau poniendo la mano pa recibir los rand, la perbona moneda sudafricano con 90 partes d'oru por diez de plata. Na llanada del ríu Limpopu pescanció lo que bramente yera la colonia portuguesa, que nun yera pior que la república que lu agospiaba, cuando vio cómo se manteníen los prietos que llevaben de safari xintando solo 'l bofu de lo que cazaben. Y bien contentos que taben éstos col tratu, y con portar aquelles ferruñoses "espingardes" que creíen que-yos daba status (más pelligroses pal negru que pa los animales) y que-yos apurríen los dueños de finques col tamañu de tou un conceyu de la Tierra del Felechu. “Aquellos portugueses sí que sabíen vivir”, camentó pa sigo de la que Mary Ann se perdía pa la capital, Lourenço Marques, pa facer compres que, daveres, yeren noticies y peticiones de los amigos inconvenienes.

            Podría ún entrugase pol verdaderu poder de Lluisín, por aquello que lu facía tan especial. Como vicepresidente y gallu la quintana naquelles tierres, nun se movía un computador de la empresa ensin el so preste y eso, naquellos tiempos, yera muncho poder. Los munchos porgüeyos entevenaos que xugaba la compañía mercantil atiestaben, tamién, con abondos campos empresariales y d'ellos nun yera ‘l menos importante el militar.  Masque la competencia baxaba de contino los precios de la ferramienta informático en cata del so cachu pastel, y dalguna subcontrata de programación enchipaba diciendo que yera imprescindible pa que la compañía vendiere más ferralla informático, lo cierto ye que la empresa na que trabayaba Lluisín yera como un supergobiernu mundial: intocable. Con esi poder trabayaba y asina lo fizo cuando reunió col presidente de la república sudafricano, Verwoerd. Ésti dexolo claro dende l'entamu: taba bien lo de la computación y el control pero eso yeren les migayes del negociu que proponíen. Naguaben pol arma nuclear y nun tenién problema en cuantu al preciu.

            Los sudafricanos invocaben la caducada dotrina norteamericano d' "átomos pa la paz" que sofitare Eisenhower nel 1953. Queríen usar enerxía nuclear pal desendolcu industrial pero non control sobre'l combustible que, cómo non, mercaríen a los norteamericanos. Yeren coscientes de que les nueves naciones negres sofitaben a los prietos sudafricanos y sabíen que, más ceo que sero, tendríen d'implicase na llucha d'independencia d'Angola y Mozambique, colonies foroñaes pola corrupción y la inoperancia militar portuguesa, amás de pol xorreciente puxu de les guerrilles, sofitaes pola Unión Soviética. Verwoerd sentenció qu'ocidente necesitaba l'oru y los diamantes de Sudáfrica y ellos, seguridá frente al comunismu. Y dexó cayer que Francia taba interesao nel asuntu. L’equipu de Lluisín tenía de pasar la información a quien correspondiera porque, sí o sí, diben tener l'arma nuclear a la llarga.

            La hipocresía internacional abría camín a un embargu comercial escontra la política sudafricana de dixebrar a los prietos de los blancos y éstos teníen claro que debíen d’entainar pa municionar si nun queríen pagar más caro la ferramienta de muerte. Podríemos entrugamos qué facía un presidente de república falando d'armes con un, digámoslo claro, comercial de computación. En realidá la empresa de Lluisín yera más de lo que paicía, y claro viose cuando  la ficha d'ésti cayó na casiella 42.

            Cuando, más tarde, el movimientu emburrió la ficha fasta algamar la 44 tuvo claro lo que diba pasar. Solo tendría d'ocupase n'espurrir el parque de computaores, lo que val dicir, colocar equipos informantes nos puestos-clave de tola alministración sudafricano. L'amigu norteamericano daría llargues al gobiernu, pa nun enfadar a les naciones negres emerxentes, y los otros, los inconvenientes, ocuparíense del resto. Pero, de toes formes, había que trabayar daqué. Primero, neto que los soviéticos usaben a los molacinos cubanos pal trabayu politicamente puerco, tendría de tratar colos de los norteamericanos: los israelíes. Éstos yeren mui bonos na eliminación d'estorvises: de la que sorríen fundíente'l cuchiellu en bandullu. D'una banda, vendíen a los afrikáner armes y d'otra, cazaben a vieyos nazis abellugaos na organización heriede del antigu Partíu Calvinista Purificáu. Mas, el trabayu de Lluisín foi fácil. Taben motivaos abondo: nun toleraríen l'arma nuclear en manes de simpatizantes nazis. Y la cosa salió barato.

            Asina, en setiembre del 1966, los franceses aportaron sero pa vender los sos vieyos reactores nucleares, chatarra obsoleto, qu'abriría la puerta al secretu arriquecimientu d'uraniu y a la solución final pola qu'allampiaben dalgunos afrikáner. En realidá toos aportaron sero, sacante Lluisín que, con presencia y preste de los cuatru representantes de los gobiernos de les provincies federatives sudafricanes, y del ministru federal de defensa, entregó la llave simbólico del gran complexu de computación que controlaría  vida y muerte de blancos y prietos.

            Sí. Toos llegaron tarde cuando Hendrik Frensch Verwoerd, el presidente de la república, cayía asesináu nel parlamentu por un blancu, renegáu dixeron.

            Los amigos inconvenientes fixeron bien el trabayu y el sueñu nuclear quedó neso: sueñu.

 

-3-

El quintu movimientu llevolu d'entornada a la Tierra del Felechu. Salió d'ella mocín, estudiáu y avarientu de perres. Retornaba mayorín pero colos bolsos llenos, muyeres de bandera, fama y retiru doráu. Pa la empresa yera cuasi un tesoru empresarial al que tuvo de renunciar cuando la ficha de Lluisín diba cayer na casiella 52. Cierto que sabía muncho pero yera xusto lo que callaba lo que lu caltenía con vida, y los escuros remaneos del vicepresidente Lluisín, pa colos gobiernos con que contrataba la multinacional, entamaben a rescamplar nos papeles de la prensa del mundiu llamáu llibre. Mr Lewis, que yera como lu concíen dende que lu compró la empresa, yera una bomba andante. Y pa los amigos inconvenienes, un llastre del que llibrar.

-----------------------------------------------------------------------

— ¿Esto ye too? —entrugó descreyíu 'l comisariu.

— Tolo que se pudo atropar —l'inspeutor diba relaxao dando l'informe verbal— Taba esperando pola comanda d'unos cafés, sentáu nuna mesa del esterior. Un puntu, que naide nun vio bien, baxó d'una moto, parez que xaponeso, y descargó-y, polo menos, un peine de bales con una automática. Pol calibre, tien pinta d'israelí, pueque una Uzi llixero, pero fasta que balística nun diga daqué ye un suponer. Darréu disparar, coló tan panchu, cola xente toa cuayao y ablucao. El camareru y un cliente, que parez que teníen la sangre más frío, viéronlo too y de siguío socorrieron al feríu....

— Y esto del "ahí vien" ¿qué coño quier dicir? ¿Quién vinía?

— Ye lo qu'oyeron dicir al morrebundu: "ahí vien, ahí vien", unes cuantes veces. Parez que fasta afogar nel propiu sangre. Una pena...

— ¿Una pena? ¡Y una mierda! —el comisariu tiró-y los cuatru papeles que-y diere primero— ¡Quiero un cartafueyu completu de, polo menos, doce fueyes mecanografiáes a doble espaciu. Nin una fueya más, que'l vieyu nun ta pa lleer muncho. ¡Y quiérolo yá!

            Un "¡A la orde!" foi tolo que s'oyó darréu.

            El comisariu quedó otra vuelta solu. Llevantó pa recoyer del suelu los papeles qu'arreflundiere y sirvióse un vasu d'Espíritu de Mazana. Unos cuantos sorbiatos más tarde, y de nueu sentáu na mesa apinada de cartafueyos, revistes y papeles, recapituló. El muertu yera persona importante, un gran fíu de la Tierra del Felechu, un illustre ciudadanu de la ciudá de Xexia, antigu direutivu de multinacional, con bonos contautos nes esferes polítiques d'Ispam y nel Partíu de la Recta Verdá. Al pasar per esti puntu de la cosa público, encabronó: nun-y faltaba más que tener d'encarase cola política. La política empuercábalo too. De xuro que'l cabrón merecía aquella muerte pero pa elli yera un gran problema el nun desengüertar l'enguedeyu porque yera eso, y non otra cosa, no que diba camín de convertise l'asuntu si nun daba una comeniente rempuesta al vieyu, y ésti, al ministru. Ye lo que tenía ser soldáu d'a pie: les fosties siempre van p'abaxu. Pidió una xarré pa volver al sitiu del crime: el Cafetón Din Durrax.

            Baxó pausao del vehículu. Nun tenía prisa. Sabía que les prises son bono pa nada. En cuantes lu nortió'l xefe de camareros corrió gasayosu al atopu. Ya se sabi: a los peones del rei hai que los tratar bien. Nun taba'l comisariu pa parola. Sicasí, non refugó'l vasu d'Espíritu de Mazana con xelu que-y ufrió'l servil. Cuando coló ésti, enfiló'l pal sitiu en que guardaben la mesa y les sielles, pero solo depués de dar un par de vueltes alredor del sitiu en que inda taba dibuxada la silueta de la víctima. Y yá, énte la mesa empuercao de sangre ensucho, nun supo qué mas facer.

            El Cafetón tenía toles meses esteriores redondes, cola superficie blanco, de mármole de Macael, decorao cola serigrafía de xueos de mesa. La xente avezaba a matar el tiempu xugando y consumiendo el caru café que servíen. La mesa qu'ocupare Lluisín y la muyer tenía el xuéu de la oca y el del cuadru. "Irónico" se dixo de la que reparaba en que la edá del fiambre yera la mesma que'l númberu de la casiella 58, la de la muerte, la qu'obligaba a entamar de nuéu el xueu si caíes nella. "De xugar, xugaría a la Oca. Naide intelixente xugaría al cuadru: xuéu valeru que nun pue tener vencedor si nun t'enfrentes con un babayu. Un inxenieru, y altu directivu de computación, nunca nun lu xugaría sinón ye pa ganar a un pinín" dixo mentalmente de la qu'averaba una siella pa sentar a forcaderes, mangando'l respaldu de la mesma al pechu y mirando embeláu la espiral del xuéu de la oca. Sofitó'l cazu nes manes cruciaes de la que los coldos encontiaben sobre'l respaldu.

            Del muertu, el comisariu conocía lo que se publicare nos papeles y l'informe confidencial que los servicios centrales d'información pasaron había unes hores. El puntu nun paicía trigu llimpio sigún una nota de Seguridá Esterior, pero nun-y abultó raro ya que yera vox populi qu'aquella empresa que dirixere nun yera otra cosa qu'una engañifa cola qu'esconder parte de los xueos qu'entamaba'l complexu militar norteamericano.

            "Ahí vien, ahí vien..." repitio en voz alto de la que volvía a recorrer colos güeyos la espiraral de la oca. "Nun tien xacíu. Aparentemente nada lo tien nesti asuntu, sacante que parez axuste de cuentes ente pexes grandes" dixo, como en xaculatoria, de la que llevantaba de la siella y alloñaba de la mesa. Miró pa la cai. Miró pal suelu del sitiu en que se dibuxaben el rodiu del calabre, la posición de la mesa, de les sielles y los casquiellos de munición. "Taba d'espaldes al asesín. De frentes nun tenía ventanes. La muyer nun llevaba gafes y taben acabante de pidir la consumición. Les meses tan vacíes hasta que train el pidíu. Ye imposible qu'hobiere daqué qu'espeyara la figura del asesín. Nun pudo velu, dafechu. Si ye asina, y asina ye, ¿a qué coño dicir ahí vien?"

            Taba perdíu nesti barruntu cuando sintió'l rescampliu de la xenialidá. Yera aquello a lo que nunca nun avezaba y que-y vinía siempres de sotrucu, como un xingón, un españíu de lluz pa güeyos que nun víen. Yera aquello, que nun enseñaben na escuela de la Policía de lo Criminoso, lo que dixebraba a un bon policía  d'un funcionariu de policía.

            Sorriente, dixo: "El cabrón nun lu vió. Daveres, a naide vió. Solo dixo lo que sabía y sabía quién lu mataba. Otra cosa va a ser prebalo pero'l muertu sabía perbien quién-y llevaba la vida. Cuasi tola vida esllarigao mundiu alantre falando l'inglés americano: ¿qué menos que dicir el nome de quien lu mataba nesa llingua?  Falaba n'nglés, non n'asturiano. Y dixo tres sílabes, tres —repitióles mentalmente curiando de facelo en bon inglés d'Oxford— Sí, tres. Evidentemente, ¡L'acrónimu del nome de la empresa!".

            El comisariu sorrió polo gallu que yera. Con aquello tendría dalgo qu'ufrir al vieyu, y ésti al ministru y, de xuro, sabiéndose quién yera l'asesín, polo menos inteleutual, capes y más capes de tierra impiadoso caeríen sobre l'asuntu pues sabía, como sabin toos na Tierra del Felechu, que nun convién fadiar al Gran Hermanu Nuclear.

            A los 58 años, bien paga foi la gloria de Lluisín.