El Cazaor de Cordobeyos

El cazaor de cordobeyos.

Razones y disculpes son lo mesmo. Irónicamente, unes suenen y train a les otres y el procesu de comprendoria de too ello, de non ser ún llistu, espurre hasta lo infinito neto que roldana que xira col envís de sacar agua en pozu ensucho. Y Mengue nun necesitaba nin unes nin otres p'axustar cuentes col poder.

Deque tenía alcordanza sabía lo que quería pa realizase nel mundu. Claro como l'agua cristalino que tenía de ser "potesti" de la "Civilia", el grupu d'élite d'ésta que curiaba del orde público. Naide como ellos pa facelo guardar. Tenía conocíos de la escuela qu'acabaren na Civilia, sí. Xusto aquéllos que nun valíen pa otra cosa que dirixir el tránsitu rodao, cobrar portalgos del tráficu o, les más les veces, embarazar a la xente con petición de cédules, papeles, permisos o xustificantes que, too en xunto, valía-yos pa sentise importantes énte los sos iguales. Los despreciaba.

Por embargu, los amigos teníalos na Potestes. Ellos, y namái qu'ellos, facíen de la Civilia un cuerpu dignu de respetar. Siempre refervió pola idea de vistir los rescamplantes correaxes de los "potesti". Portar armes. Participar na investigación de lo criminoso. Ser un potesti yera lo que más quería. Lo único pa lo que valía. El finxu en que sofitar la vida. Tola vida.

Cuando 'l Ministeriu de lo Criminoso aprebó la ufierta añal pa ingresar por oposición na Potestes de la Civilia y, darréu d'ello, el Voceres Oficial espublizó l'apertura del plazu de venti díes pa interesar l'ingresu, el primeru en presentar l'oficiu d'almisión, amás del pagu de la tasa 075, foi Mengue. Y la oposición nun podía ser mui aquéllo. Daveres, la cosa tratábase más de güevos que de fueros. Arreblagar l'ensame prebes físiques yera lo importante. El pilancu yera l'amosar. L'amosar lo muncho burru que se yera, lo grandísimu castrón que podríes ser, l'inmedible amor a la Patria del Felechu. Un potesti nun necesitaba saber la regla de tres o calcular un porcentaxe: pa eso yá taben los potestimínor, los miembros de la Faza Almininistrativo de la Civilia. Y tampoco necesitaba saber de tránsitu o d'ordenances fiscales, pa eso taben los despreciaos civili.

Con estos camientos, y estruciendo 'l porcono tetrabric de vinu que mercare cola caridá de los comunes, Mengue sapozó un migayu más nel mayor desesperu y rensía. Nun yera potesti. Nin siquier un putu civili. Nun yera otra cosa qu'un desfechu humano con información inútil. Menos qu'una daquelles chalanes que vía mecer en puertu porque élli fundía nun mar, pero de mierda, al debalu de la vida, n'inminente acabación. Tantu enfotu pa, acabu, nun ser nada na vida.

Peslló los güeyos pa vese na milicia obligatorio: l'unicu sitiu en qu'acancalló el poder d'un arma. El llugar en que-y enseñaren daqué sobre la química de la muerte. Nel que supo del orde y l'honor. Venti meses de gloria y la patada en culu del fin del serviciu. La cai. El desamparu. La miseria de vese inútil pal lladriellu y la fesoria. El descubrise ayenu al mundu del común. Pero nun podía siguir neses fabulaciones. Llegaba la hora de la ronda del controlaor de la ordenanza regulaora del tráficu. Los faltosos que curiaben del permisu d'estacionamientu na cai y élli nun lu tenía. ¡Dios, cómo los odiaba! Teníen más derechos los automóviles que élli. Como home, valía menos qu'ún d'aquellos inxenios tusidores. Y eso yera inxusto. Llevantose trabayeramente pa ver aprucir pel cercanu corneyal la chulesca figura del controlaor, gafes prietes y media sorrisa, quitando'l polvu al tolete que fundiría nel so costellame sinon entainaba pa esmucise fuera del so campu de trabayu.

DESHONORIS

L'infaustu día de la graduación foi increyible. Corría l'alcol perdayuri. Moces, a sueldu o non, y putos pasaben de manu en mano. Nenguna entepierna descansó. Aquello foi la mundial. Sin medía. Sangre enforma mozo como pa decatase del escesu. Encesa l'alarma de la superioridá, la purga exemplarizante garrolu inxeme de minga y alcol, tresvoláu y n'allorie. Cayeron-y fosties (non menos qu'a otros de la promoción) y la espulsión fulminante de la Potestes, paradóxicamente, primero de ser almitíu. Pesllada aquella puerta pa siempres yá nada tendría xacíu pa Mengue. La milicia solo espurriría-y la conderga de sabese fracasáu.

CORDOBEYOS.

Llamaba asina a los controlaores. Tamién podía llamalos gochonos pues había ún por corripia urbánico, pero gustába-y más lo de cordobeyos. Sonába-y inda más despreciatible y ofensible. Mengue nun se decatare d'ello, pero lo cierto ye que nesi cuerpu d'orde públicu fiscal había embalsao tolo que tarrecía de la inxusta sociedá de la Patria del Felechu que-y entorgare el ser feliz. Col correr del tiempu prescindió de la Potestes y la de la Civilia como oxetos odiables. En xeneral ellos nun-y molestaben. Esi poder esistía pa los comunes y élli, a aquelles altures de la vida nun pertenecía a ellos: yera invisible. Pero colos controlaores yera otru cantar. Aquellos castronos, vulgares comunes con gorreta de xenerale y enfotos de potesti, perseguíenlu de corripia unbánico en corripia urbánico obligándolu a andar tol día d'equí p'allá hasta que, rendíu, venía la nueche y el fin del control del estacionamientu. Namái entóncenes podía vencese al sueñu, entregase a la cansera pa pacificar baxo caxes y forgaxes de cartón nos pocos abellugos inmundos que reñía a aguarones y perros axabalinaos.

VENGATIBLE

Nunca nun escurriere en venganza sofisticao. Sabía qu'un día diba a fundir un pinchu en bandullu de cordobeyu y qu'alegaría xusta defensa nel so provechu énte 'l xuez que-y tocare. Pero la cosa prosperó cuando atopó una caxa de maera vacía, con etiqueta enlluxada, del Ministeriu Ofensivu. Yera de carbayu, de dos coldos de llargor y xubía ún, con dos agarraderes ferruñoses nos cabos. Conocía aquelles caxes y el golor que desprendía volviolu, d'esmenu, a los sos tiempos de la milicia. Sabía que yera d'esplosivos y nun s'estrañó gota por atopala na escumbriada na que caciplaba davezu en cata de daqué indefinío que-y sirviera pa llenar una, tamién, indefinía carencia. Depués de too, a dos kilómetros xacía l'abisíu calabre desamortizao del vieyu cuartel de la milicia, el Qiristo-Foros, sometíu a especulación urbanístico y renta político. N'ensoñación, l'arume dulzaplayo del nitrotoluenu remembró-y la química de la muerte. "¿Por qué non?", oyó na moyera. Élli sabía. ¿Por qué los demás nun diben saber que sabía? Aquellos castronos diben ver lo que valía Mengue.

XARDINOS.

Quien nun entruga esmolez menos. Y ser invisible tien munches ventaxes. El sacu de cincu kilos d'abonu KPN salió-y a cuenta porque taba n'ufierta. Necesitaba cazos, agua, fueu... nada estraordinario. Nun tendría C4 militar pero sí un deriváu del amonal mui arregladucu. Y taba xuro de que en cuatru corripies urbánicos a l'arrodiada diben a oyelu. L'esplosivu falaría por élli.

Agua destilao pa bateríes eléctriques d'auto. Alcol absoluto. L'éter costo-y más trabayu atopalo pero una vez fecho ello, camudó de manos nun xuasús tres una bona obra d'engañifa y distraimientu. Gamuya, cartón, papel, mestrizu. Abollaos cazos d'aluminiu y un par de vasos de Duralex vieron la destilación del espíritu vengatible. Cuidosu, Mengue sedimentó la pastia del poder y la xusticia. Pero necesitaba un fulminante. Y un temporizaor. Y un continente amañosu pa facer lo que debía facer.

La indispensable basoria dio-y lo que necesitaba. Un vieyu telefonín de Nokia nuna caxa que tenía, tamién, cargador y pila. Pasó un día enteru cargando la pila nun llavabu públicu. Tuvo de facer muncho esparaván pa que lu dexaren como barrenáu, inofensivu. achucháu a la taza del retrete. Demientres, el sabiu empate de filos elléctricos enerxizaba 'l telefonín.

BIEN

Elixó la cai Eyaculatio, la más viviego del llugar. A eses hores, por embargu, solo cargaben los atroxaderos de pubs, discos y unes cuantes sidreríes enxertaes na modernidá del escanciaor homocinéticu. Al abellu de la solombriega antoxana del númberu 157 de la cai vio venir al controlaor de turnu. Nun intre supo quién yera. Sí, aquél castrón yera Vacaloria (ignoraba 'l so nome de home, si ye que, aquello, merecía la condición de talu), un cachu carne grande n'anchor y untu, d'amplia frente y tovía mayor pilforrez. "Francamente prescindible" díxose Mengue con media sorrisa y boca ensucha.

Tres les negres gafes, Vacaloria acusbiaba, ceremoniosu, los xustificantes d'estacionamientu nos vehículos de la cai. Con esi aire de desafuegu propiu d'autoridá emprestada por gorreta y correaxe paramilitares, ximielgábase tou enchipáu con pasu fongo y figura tremoso pola aberración óptico del calor desapegando d'asfaltu calecío. A cachos, paraba y abangaba sobre el cristal guardafocicos. Miraba y remiraba y, más de lo esperable, podía vese cómo-y prestaba pola vida desapartar el cauchu llimpiaor del auto pa llantar l'oficiu de denuncia que-y aseguraría mayores ingresos mensuales sobre 'l salariu mínimu que-y garantizaba 'l gobiernu de la ciudá.

Unos coches más alantre, y más atrás, del que tenía el regalu pa Vacaloria, Mengue mangó caxines y cartonucos vacíos de tabacu, golosines y otres porcancies. Poro, cuando 'l controlaor algamó l'altor del vehículu, un Avtovaz-3.1416 (conocíu popularmente como "PI"), nun reparó na puerca caxina de cigarrinos turcos aromatizaos a la bergamota que taba prisionera del cauchu llimpiar del guardafocicos. Vacaloria namai adicó na falta de cobertura horario del xustificante d'estacionamientu. Sorrió al esrabetar, cola mano isquierda, el cachu de cinta de papel continu que costituía l'oficiu de denuncia cuspíu pola máquina ad hoc. Cola derecha llevantó el cauchu un poquiñín, abondo como pa calar la denuncia. Abondo como pa cerrar el circuitu del fulminante.

EPIDEMIA.

Llevaben recoyíos más de venti parez de zapatos, colos sos respeutivos pies y piernes, como únicu resclavu identificable d'otros tantos controlaores. Una epidemia. Un desesperu. L'españíu solo dexaba aquello incólume. El comisariu Sariu, de la Faza de lo Criminoso de la Subestación de Seguranza, nun tenía tiempu nin pa mexar. Tolos díes llamaben de la capital y nada había pa parar aquello. Los controlaores taben en fuelga y los ingresos de la ciudá caíen na estaya del tributu por estacionamientu en zona O.R.A. Los seguros nun cubríen los daños. El vieyu comisariu xefe, Camaleo Sanctus, taba a un xuasús d'infartar...

Demientres, Mengue gloriaba tranquilu nes cais. De la xusticia.

Costante Álvarez

ACQUA RUGIA

SUBESTATIO


Retumbeyó una voz vocinglero de glayu añosu pel interfón "Philips" de cuando la guerra.

-¡Que venga Sariu!

Aportó 'l comisariu al llamatu con un aquél de galbana y desafuegu propios de quien conoz el tarrén que pisa.

-"Susórdenes" -presentose pocu marcial.

El vieyu Camaleo Sanctus taba a puntu xubilar y a aquel altor de la vida cualaquiera cosa facíalu escagalerar. Eso persabíalo 'l comisariu. Y tamién que too dába-y llercia, n'especial el que, por un aquello de la vida, nun-y fueren conceder la naguada insinia por servicios "Ab_Neka2", con llucerín bermeyo, que llevaba amestao una paguina vitalicio qu'arredondiaría-y amañoso la probe xubilación de funcionariu supernumberario del Ministeriu de lo Criminoso que-y alguardaba depués de trenta años de serviciu al réxime estamental.

-¿Qué ye esta vuelta, D. Cama? -entrugó 'l comisariu col apócope familiar de los munchos años de serviciu xuntos.

Por rempuesta recibió ente les manes un cartafueyu bermeyo mediu metíu nun estoxu marrono con una pegadiella coles sigles "NS" soliñaes, tamién, en bermeyo y un nomatu garabateáo a priesa: "Xabaritu". Sariu abriolu y estró la mesa con semeyes, dellos papeles d'oficiu y un informe con pinta de forense. Oyó la voz pastoso del vieyu Camaleo

- ¡¡Cangondiós, meses namás. Unos putos meses pa dexar esta basoria y véome nesto...!!

Tratábase d'un típicu cartafueyu "namaisuyu" de naturaleza más que confidencial. Los casos "NS" nun salíen del despachu del Xefe Criminosu, nesti casu el de D. Camaleo, y suponíase que naide sacante élli podría tener accesu al mesmu. Pero dende había lo menos dos años el comisariu Sariu tamién exercía d'alteregu de D. Cama nesos casos.

El vieyu siguió esbravetando pa escontra'l sistema y la naturaleza humano. Apertaba les manes en puños blancos de la que movía compulsivu d'un a otru lláu de la mesa metálico repintao milenta vegaes y amortizao otres tantes nel escasu presupuestu de la Subestación de Seguranza.

- Si non iguamos esti asuntu va cayeme una bona. Y nun fai falta ser dios pa saber que nada tendrá valío tolos años que pasé nesti sumidoriu de maldá apagando fueos ayenos, prindando chorizos, cabrones, matarifes y bermeyonos... Too a la puta cai l'escaezu y adiós mui bones a la inisinia...¡¡Cagondiós qué mala foya!!

Sariu tentó tranquilizalu. Y consiguiolo. Aparentemente yera un homicidiu ente xente manflorito. Cierto que yera un ambiente daqué difícil d'investigar pero non imposible. Tovía remembrábase d'un casu mui gordu qu'hebio na ciudá allá pelos años del triunviru Casianu: el casu de "Rambalina". Aquello si que foi difícil d'atapar y si fueron a ello d'aquélla, con menos medios qu'agora, nun vía el porqué de nun lo facer con esti otru asuntu que llevaba la mesma traza. Comentolo col vieyu.

- Esto nun ye lo mesmo -arrepostió amarguriamente 'l vieyu xefe- Sacante que les dos vítimes son maruxos, esti del Xabaritu ye muncho peligrosu... pa nós.

L'aire misterioso que garraba l'asuntu nun-y prestó gota a Sariu. Y el "nós" aquél punxo-y la coruxía en cuerpu.

- ¿Nós? -la cosa merecía una desplicación.

- Sí, nós. Y convién nun lo escaecer. Por mui "NS" que sía l'asuntu cíncamos a tolos de la faza criminoso d'esta Subestación. Si esto va mal nun vo ser yo solu 'l qu'apechugue cola mierda. Conviénte pescancialo prontino y que lo fagan toos de ti p'abaxu. Los cabrones de la capital fexeron lo fácil pero parez qu'empapizaron y agora el "so" problema -xesticuló a modo- ye 'l "nuestru" problema.

El vieyu tomó fueye

- Mira, Sariu, esto hai que lo iguar rápido y elegantemente. Quiero absoluta prioridá. Conxela tolo que tenga ente manes la Subestación. Toudiós metíu nesti asuntu hasta lo "solucionar" -calcó la pallabra a queriendes- o vive diós que vamos a teneles....

El vieyu represó lo que diba dicir con goyada bien espresivo. Sariu, asintió respetuosu.

Na xíriga de la Faza Criminoso de la Subestación de Seguranza que capitaneaba D. Camaleo la pallabra "solucionar" yera enforma polisémico y la forma en que la emplegó 'l vieyu aquella vuelta, antónimo de resolver académicamente un problema.

Nel despachu propiu, el comisariu Sariu espurrió cuidosu la información del estoxu. Papeles y fotos falaben d'un más que posible y típicu crimen pasional. "¿U 'l problema?" entrugose aliáu 'l comisariu. "Puéque hebia más de lo evidente" arrepostiose de la qu'apurríase un vasu pa char unes pingarates d'anis seco.

Tres sorbiatos de "La Praviana" depués, algamó 'l tueru del asuntu. El problema yera que taba per entemedies un fíu bastardu del mesmísimu Ministru de lo Criminoso. Aquello yera bien estremao de lo qu'esperaba, Ya nun se trataba d'un Testaferru Xeneral, nin d'un Gallu Servil, cargos políticos de baxa nomadía en comparanza con un ministru. La cosa cincaba a la cúpula del poder alministrativu na represión del delitu y la seguranza interior del país. Mala cosa.

Al tal "Xabaritu" atopáronlu alicatáu a puñalaes con nun se sabía bien qué cosa. Lo espantible de la escena coronaba con un colgaxu mangáu na boca de la victima: lo que paicían les sos partes pudendes. Yera evidente que lu caparen, pero de mui mala traza porque más que cortar esgarraparon con saña. El forense nun esclariaba muncho al respective. Dicía que si hebio violación l'estocín yera de tala magnitú que nun se podía saber con seguranza y l'arma del delitu yera un misteriu porque les feríes nun seguíen un patrón histolóxicu conocíu.

La cosa nun sería malo de nun conocese la relación del putu col "guapu" Xosé d'Arimatea y Putin, ún de los fíos bastardos del escelentísimu siñor D. Cinxu Xeles de les Astuires, grande d'Ispám y, circustancialmente, Ministru de lo Criminoso. El bastardu, conocíu nel ambetu manfloritu como "Chelines", tuvo 'l mal aquél d'encoñar (términu problemáticu d'emplegar nesti casu) con Xabaritu, el más putu de les marigarcíes de la ciudá al que se-y conocíen amantes a mamplén.

Testigos dicíen que vierenlos xuntos la tarde del crimen y too apuntaba a que ésa fuere la última visita que recibiere 'l Xabaritu.

La cosa complicaba pola política. Eso taba claro pa Sariu. El ministru, que reconociere al fíu nel so día colo que perdiere puntos d'influencia na secta relixoso "Opus Sacrorum" (qu'apurría cuadros dirixentes al réxime estamental), agora ruxíase que diba directu a la presidencia del partíu relixosu "La Recta Verdá" que sofitaba la ilesia d'Ispam. Evidentemente, nin quería ni podía vese embarcáu, nin siquier chiscáu, por un feu asuntu de crimen ente xente "contra natura".

Yera evidente que l'asuntu habia que lo tapar. Esaniciar testigos yera cosa fácil. Un papelín garabateáu de mala gana y grapáu na última fueya avisaba d'un accidente de carretera con resultáu de muerte pa ún d'ellos. L'otru que quedaba taba en paraderu "desconocíu" (espresión que en xíriga de subestación significaba tar metío en cal vivo) y varios clientes de Xabaritu (los más incontrolables) taben "fuera circulación", dicía una nota a llápice mangada al marxe de la mesma fueya. La eficiencia y fama de la Faza Criminoso de la Subestación de Seguranza de la capital nun yera de baldre. Pero tanta eficiencia estreldaba llaceriosamente polo que cincaba al arma homicida. Cenciellamente ye que nun apaicía per lláu nengún. Y eso yera cosa serio.

Los papeles dicíen que nun se sabía fixo si Chelines fuere 'l verdugu, masque lo negare pero, de non selo, un posible "otru" que toviere l'arma tendría ocasión abondo pa emporcar el futuru políticu del güei ministru pues habría los medios y, andando los tiempos, la ocasión pa facelo. Nun se podía interrogar a Chelines, por orde superior,y el muertu y los testigos nun diben falar, evidentemente. Sin sabese 'l paraderu del arma la cosa taba mui complicao y eso diba a martirizar a Sariu y, "per saltum", a D. Camaleo muncho más.

El comisariu recudió en gargüelu 'l vasu anís y dexó los papeles. Esbilló les semeyes. El reportaxe gráficu yera mui bono, pensó pa sigo, pero de toes formes invitaben a una ispección ocular más fondero. Porque pa Sariu nunca nun podríen les fotos arreblagar purriba la finura d'unos güeyos profesionales. Y élli teníalos.


LOCO CRIMINIS

Había cuatro díes del atopu del calabre. Too taba igual que nel reportaxe gráficu. L'inspeutor criminoso que lu acompañaba esplayose llárgamente en que too taba igual qu'entóncenes. El puntu, de nome Paulo Caçâo, pertenecía a la Subestación de la capital que llevare l'asuntu hasta que-y lo pasaren a ellos y gastaba esi enchipe mal disimuláu de tolos d'ellí, xulgó Sariu. Nun podía fiar muncho d'un colega de xuro rensiosu por vese arrequexáu d'un asuntu gordu que, bien remanáu, trairía recompenses y merecimientos xugosos pa una carrera policial en provincies.

Sariu dedicose a comparar la escena del crimen coles fotos. Oservó llargamente 'l pisu, la cama, les alfombres. Decatose d'una mancha sangre muncho más esllavao qu'el restu d'elles, asitiada cabo l'antigua fresquera. Na foto d'esi sitiu, la númberu 6, apaicía un manchón de sangre d'apariencia menos mesto qu' otres de los alrodios.

-¿Había agua pere equí? -entrugó Sariu
-¿Saben a qué hora fexeren la llimpieza de la pensión?

Les rempuestes fueron siempre negatives. Quiciaves fuera un asuntu de desenfoque de la cámara nesi sitiu. Una aberración cromático. Un xuegu de lluz. Una vulgar dispersión de los productos sanguíneos mecios col carnizu y otros xugos biolóxicos.

TABERNAM

Una selmana depués d'atar en curtiu a xueces, fiscales y prensa, Sariu tomaba un café na Taberna irlandesa de la cai Eyaculatio, la más viviego de la ciudá a aquelles hores del atapecer. Esmolecíu pol cachón que-y venía al nun ser a pesllar el casu d'una forma llimpio, vió como'l camareru, que taba preparando'l xelu pa piedres de cocktail, chaba un cagamentu de la fostia. Taba acabante cortase con él y sangraba pola manu como gochu en samaratín.

Como una bala, Sariu sacó'l telefonín y cacipló nel menú el númberu priváu de D. Camaleo. Riendo con ganes pidió-y que descansara y pensare más nel llugar de vacaciones al que diba dir a celebrar la xubilación, con insinia de servicios "Ab_neka2" con llucerín bermeyo, que nel fostiazu que-y vendría del Ministeriu de lo Criminoso pol casu Xabaritu. Baxó la voz cuando-y dixo que naide, pero naide naide, tenía l'arma homicida.....

- ...Porque un carámpanu de xelu, queríu D. Cama, dexa poques güelgues dixitales -esclarió Sariu- y el champán de sangre esllavao de la foto 6, cabo la fresquera, aú tamién ta 'l conxelaor, nun ye otro que los resclavos del arma perfeuta pa un feu asuntu sesual"

Cortó la comunicacióln y d'un güelpe metió en banduyu el solisombra d'anis "La Praviana".


Costante Álvarez

Nun tan llueñe

A Valentín, por ispirame esta hestoria, que ye verdá. Que nun lo ye. Los caminos de la esistencia son infinitos.
-----------------

Encesa

A1

Masque nenina, na ilesiona tevo tiempu abondo pa repasar la curtia vida. Culpabilizase, martirizase, aforgugar en penes, escaecer de gayoles y cásique descuaxaringar d’entendederes y vida. Porque naquel Xixón de fumu borroneru, parés afogonáes y axustes de cuentes, (muertos y mataos mediante) la moneda de compraventa pa sobrevivir nun yeren los belarminos o les pesetes facistes, non. La vida cotizábase en balances cuidosamente calteníes por esguízaros, gulismiosos de fortuna y padremuñu ayenos, xueces indireutos de la inxusticia, íncubos de la infamia súcuba, pesadores d’almes qu’arromanaben la existencia de la víctima col pesu de la envidia propia, inconfesa y vergoñante, que decidía la muerte del corderu en paséu de prietu alborecer y ingrientu fierru de fusil nos cantilos de la Providencia o n’escuros caleyos de Somió.

Nun yera a entender el porqué de tar ellí, arrodiada d’otres como ella, toes rapaes, toes pelones, alguardando nun sabía bien qué xusticia. Solo sabía de la muerte de tola familia que conocía. Que en Puau yá nun tenía a naide. Qu’aquel mal sueñu nun acababa. Y que naquella vieya camioneta lleváronla espía pa xirigoncia de toos, con toles otres coles que compartía infamia. Insultáronles. Arreflundiéronles tou tipu de porcancia y mondicia. Pero, sicasí, inda tuvieron la gracia de ver riscar un nueu alba. Otros, nun volvieren.

B1

Daquelles penoses imáxenes sacola el xiblíu de la pota esprés. Baxó la llama y punxo el cronómetru pa trenta minutos. Acabó d’afatase pintando los llabios con el carmín que más-y prestaba. Mirose d’arriba a baxo nel espeyu de l’alcoba de matrinoniu y calzó de tacones. Un portazu selló l’ausencia.

Pilina taba na botica, como siempre dando-y a la parpayuela. Yera bona moza pero muy verdiasquera. Debería casar pa tranquilizar d’aquellos fogaxes que canalizaba despeyeyando a los otros y consolándose a soles. Debería facer munches más coses que a ella, siñora de, agora nun-y importaben. Nun importaben porque lo que necesitaba yera que-y dexara dir al mexaderu de la botica. Y sabía el camín. Conoció a Pilina cuando ella dexare la botica pa casar, cuando cazó (sorrió al usar esti verbu) a Plácidu, so maríu. Taba en terrenu conocíu. Sabía ú taba y cuánto tenía de garrar. Sabía lo que necesitaba pa esborriar, d’una puta vez, aquellos malos sueños que l’atoxigaben dende 1939.

A2

La camionteta paró a la puerta la Plaza Toros, nes afueres de Xixón. Los moros guardaben aquella prisión con desgana. Cuidaben una brañada siempre amenorgante pero que, por embargo, como fonte de la que se saca agua, paicía nun dir escosar nunca. Al alborecer sacaben un par de camiones, que tornaben vacíos, pa recibir a la tarde otru par d’ellos enllenos de muertos qu’inda nun lo sabíen.

Ella vió aquellos Hispanosuizas runfantes, afuracaos de chapa y ensin cristales, fedióndigos d’humanidá inhumana gomitar presos morrebundos. Vio un blindáu, que sabía de la FAI, reconvertíu al Movimientu. Y vió a un capitán invictu distribuir el cargamentu de muerte a diestra y siniestra. La suerte de parecer virxen guardola de que la pasaren pela piedra los moros. Reserváronla pa los oficiales. Aquél cabu sabía cómo contentar a quien podría pagá-y más de lo que valía una puta bermeyona. Porque a ella, a aquélles altures de la guerra, ya nun-y costaba nada amaliciar.

B2

Depués d’unos besinos y d’afalagar el tipín de princesa de la manceba pudo dexar a Pilina. Enfiló l’escusáu. Nel estante mas a desmano atopó la botellina con preparáu arsenical. El polvu que decoraba la estantería amosaba a les clares el pocu usu que tenía. Rápido, metió el goteru y estripando la goma fexo xubir pel tubu cristal una medida de llíquidu. Metiolu na so botellina y roscó la tapa. Alendó tranquila cuando desandó’l camín hasta l’amosaor de la botica. Pilina siguía despeyeyando con Flori de Xenra. Muá y muá y carretera.

A3

Metiéronla no que fuere’l botiquín de la plaza toros xunto con Juani, una moza mayor que conociere na Ilesiona. Ella-y dixere que llevare yá dos meses enzarrada ensin saber el porqué. Les dos yeren un tributu, un portalgu irregular que pagar pa poder cuntar les mañanes. El futuru nun algamaba más p’ellá d’un día. Y pa l’atapecía la puerta del botiquín cedió énte la presencia d’un mozu, capitán, calzando rescamplantes botes de caballería y chulesca boina militar. Pesllaron la puerta y nun demoró muncho en garrar a Juani, llevantá-y la saya, sacase la minga, fita y dura cualu aceru, y tomala darréu too tuexu, con lloquera necesidá. Vació nella tan raudo como la tomó, neto que quien mexa depués de fartucase a beber sidra. Fecho ello, él relaxó cara y cuerpu. Por embargu, Juani permanecía blanca y petrificada. Mangó-y una fostia ‘l capitán “para qu’entrara en vida”, sigún dixo risonderu a naide, pero Juani recibiola ensin gurgutar, igual d’empertegada qu’enantes y siempres ayena a lo que-y facía. Un cachín depués de beber a briches una botella que traía y que-y golió a oruxo, otru par d’hosties y voltiola pa ponela d’espaldes. Esgarrapó-y la falda, yá fecha falampernios y sodomizola inda con más ganes. Pero aquella vuelta Juaní sí vieno a la vida, pol dolor.

Desafogáu el militar, de la que colaba dexando a Juani en quexa, esbarrumbada, focicu en suelu y culu al aire, al empar qu’apertaba la corréa del pantalón cola manu derecha acercose a ella. Descolletó-y cola otra la breve y porcona blusa. Vió poques mamielles. Carne blanco. Piel infante arropando clares costielles. Darréu, baxó la mano y, sobre la falda, palpuñó-y coín y entepierna. Disgustose. “¡¿Qué coño traéis equí?! ¡Nun facemos la guerra contra los guah.es!” gritó a la puerta. Abriéronla y mandó que la soltaren, yá, con un cachu pan. Echáronla a emburriones. Juani quedó tres la puerta. Nunca más la volvió a ver. La cara d’aquel home escaeciola pa siempres.

B3

Na más entrar retiró del fueu la pota. Dexola pa enfrescar baxo ‘l grifu y enfiló l’alcoba. Desvistió de cai y púnxose de llar. Garró el goteru y baxó a la frescera. D’una vieya caxa de madera, na qu’había tiempu servíen a los estancos los paquetes de cigarrillos “Celtas”, agora enllena de cacía y tarecos, estraxo otra de llata. Y d’ésta una botella na que llarimó el pocu velenu traíu.

A4

Con venti años conoció a Plácidu Arangu: elegante y educáu, home d’orde y prestixu, profesional de la seguridá público. Con mandu en plaza. Y l’amor o la necesidá, porgüeyos mútuos, l’utilitarismu del do ut des... ¿quién sabi el porqué? , la cosa ye que vieno casoriu, vida marital, respetu y proyeutos. Una vida convencional, pactada y mútuamente servil. Nada estraordinario pa la dómina na que taben. En resume, una vida comeniente. Y con ello tamién vinieron les sospeches, les faluqueríes, envidies, mermuries y canduercos. Ceu, desconocíos que dicíen tener bones intenciones, cuntáben-y coses terribles de D. Plácidu, de que si mandare matar a munchos en Xixón, de que si foi mui malu, de que mandaba facer los paseos que na Plaza Toros nun teníen bon acabu... Y ella tiró del filu y atopó al so maríu metíu na muerte de la xente de Puau. O eso-y paició.

A5

Venti años viviendo con un asesín. Eso ye lo qu’oyo dientro la cabeza cuando decidió sacalu del mundu los vivos. Tantos nun podíen enquivocar. Tan mala fama, en sin dulda, tenía d’enraigonar en cosa cierto. Mas nun podía ignorar l’amor que sentía aquél home por ella. L’amor qu’ella inda setía por élli. Valió-y l’alcordase de la so familia muerta, de la casa de Puau amburada, de la cárcele na Ilesiona de Xixón, del camín a la Plaza de Toros, de la esapaición de Juani... too en xunto valió-y pa dexar d’amar a aquel home agora desconocíu. Y el restallu de memoria que-y fixo ver la cara d’aquél militar que creía tener escaecío valió-y pa sentecialu a muerte. Nun yera antoxu. Yera xusticia.

Como ex-manceba, sabía que la dosis mortal yá la tenía. Pero necesitaba asegurase de que fuera rápida. “Lo qu’abonda nunca nun sobra”, camentó, y empobinó a la botica pola cabera cantidá que furtaría. Atopó a Pilina falando con una vieyina atoxigada de rema. Se saludaron y usó el vieyu trucu de dir a char una mexadina porque agora tomaba muncha agua que, ya se sabi, yera muncho bono pa tar delgadina y sanina, eliminar porcancies y mantener llimpio sangre y riñón. Y cuando volvió del asuntu que la llevare al velenu Pilina presentó-y a Sinda la del H.artón, paisanina d’un pueblín de Peñamellera, vilda d’un notariu de Xixón de tola vida. “¡Ai fía qué suerti tuviesti con Plácidu! ¡Qué home más buenu llevasti! Cuntába-ylo a Pilina, lo muncho que fixo por salvar a aquellos probes que llevabin al degoladeru de la Providencia. Agora qu’estos cabrones socialistas saquen tanto d’eso de la memoria histórico, toos esos cuentos de la guerra (que yo nun digo que nun sían verdá), naide diz lo bono que fixenon homes como el tuyu que tanto llucharon pa que non morrieren aquellos prubitinos de la Plaza Toros. Dacuando cuntábamelo mio home y nun tenía más que palabres d’agradecimientu pa con Pllácidu. ¡Qué gran home llevasti!”.

Plasmó. Aquello consasaba mui mal colo que-y cuntaren otros. Como miembru de la policía yera intachable pero, claro, la policía cuando Franco ¡tenía tan mala fama! Igual aquellos qu’echaben tanto contra so esposu nun yeren tan sinceros como paicíen. Igual élli nun tenía nada que ver cola muerte de so familia. Nada de Puau. Nada de Juani. Nada d’aquél castrón al que, por embargu, debía-y la vida....

C

Na casa de Plácidu Arangu too taba en silenciu. Como siempres, Nunca nun hebio nenos. Nin perru. Nin gatu. Solo vida de pareya. Solo respetu. Solo amor, primero carnal y luego divín. Y a Plácidu poques coses se-y escapaben. Ya se sabi: l’oficiu fai muncho. Sabía de la so muyer visitando a Pilina, guardando coses, viéndola distanciar dende había tiempu. Y nun ye que-y importare la falta de sexu pues lo compensaba con otres coses que nun amenorgaben l’amor por so esposa. En realidá, a aquella altura de la so vida poques coses-y importaben yá. Fixere lo meyor que pudo colos tiempos que-y correspondieron vivir. Respetare la llei que élli non punxere. Respetó a los otros y a sigo mesmo. Cuando esgolifó aquella botellina nun-y quedó dulda. L’arume a almendra amargurio anunciaba ‘l velenu. Quiciabes ella yá taba fartuca d’un vieyu como élli. Pescanciaba qu’igual tenía otres necesidaes, necesidaes que élli ya nun podía satisfacer. Élli siempre la respetare y ella de xuro que tamién. L’amaba. Y lo facía, imperdonablemente, sin pallabres. Su corazón yeren les pallabres. Los sos güeyos, qu’humedecíen al pensar n’ella, yeren les pallabres. Quiciabes nun la mereciera, pero eses fueron les cartes que xugaron. Y les xugaron xuntos. Si ella agora nun lu quería nun podía obligala a amalu. Sí. El viaxe fuere bonu. Pero tolos viaxes lleguen a un fin.

Nun atopaba les llaves p’abrir. Tantu bolsu y tanta hostia pa nun ser a entrar en casa. Al fin pudo. Entró llamando a Plácidu. “Amor”, punxo na so boca. “Amor, ¿Aú andes?”. Salón vacíu. Cocina vacía. Terraza vacía. Empobinó pa l’alcoba, subidoria enriba, y abrió la puerta. Entró ensin decatase de que salía un airiquín fresquino. una leve revexina que-y acarició la cara y xugó col pelu. Ellí taba Plácidu. echáu na cama, con cara de tar prestoso. Descansando. La muerte, piadosa, ñegára-y l‘espantible y postrer biecu de l’acabación por arsénicu.

Plácidu lloró. Lloró muncho. Y lloró más lo que pensó que yera la muerte del amor de so amada por élli que’l so viaxe a la nada.

Mui cierto qu’ella nun lloraría tantu. Con güeyos cásique ensuchos, munches de les sos llárimes vertiérense enantes. Reposaben en Puau, mecíes coles cenices del llar. Na Ilesiona, entevenaes de dolor propiu y ayeno, y d’agua bendito resinao. Na plaza toros de Xixón, con Juani y los otros. Con toos aquellos que nun volvió ver.

Costante Álvarez
23/02/2008

Nadjnne Fjor

-1-

Markhius Xostronu tenía de solucionar un retu. Élli sabía bien que nun podía llamalu d’otra miente. Repetíase en xaculatoria, cualu mantra índicu, “retu, retu, retu….” esperando non invocar aquel degorriu personal que lu atiñazaba de muerte cuando perdía el control referencial: el pánicu. Sabía, pola terapia de PNL que recibía d’una eminente, y carísima, doctora sueca, “misis” Nadjnne Fjor, de la importancia de les palabres. Nun quería pronunciar aquello que la pallabra “retu” desfilaba.

Lo cierto ye que que Markhius tenía un bon problema, una fobia, una llosa social que lu estrapallaba profesionalmente: nun yera a soportar el contautu colos otros. Y nesi “otros”, creyéime, podía meter a muncha, pero que muncha xente. Asina que llevantaba ceo, desayunaba inda más aína y salía too esmanáu pa la xarré, calcando espritáu l’aceleraor del auto col envís de nun atopar a naide na carretera que lu comunicaba col parque empresarial en que desendolcaba un rescamplante trabayu profesional como programaor d’altu nivel en llinguax neoxenerativu d’intelixencia artificial. Esperaba nun alcontrar a naide nes fríes cais de l’alborada o nos calecíos pasiellos del trabayu.

Nun soportaba a naide. La presencia de los “otros” yera insufrible. La relación social, inesistente. Inesistente, ciertamente, sacante la imprescindible y necesaria pa xustificar les bones perres que-y tresferíen a la cuenta del bancu, ellectrónica y por tanto asépticamente impersonal, que-y aseguraben el títulu bancariu d’escelente cliente. Nun los aguantaba y, poro, cuidaba de nun relacionase más allá de lo inevitable sapozando embeláu nel trabayu que toviere ente manes. Ello yera sabío y apreciao pola direición de la empresa, que veía n’élli un modelu productivu interesante.

Los guardies y vixilantes de la corporación conocíenlu bien y en cuantes veíen aprucir, pel corneyal de la cai Thomas Edison qu’aportaba hasta la empresa, el focicu del vieyu Zástava de manufechura yugoslavo, con lluces de mariello-auto, motor runfante y siempre tusiente por fallu crónicu de carburador, preparábense pa facer rápido la operación d’identificación d’aquel suxetu que tantu valoraben los d’enriba pero qu’ente los d’embaxo nun paicía tener otra virtú que la d’esguilón repunante y la d’esclavu: siempre solu y trabayando a ráu estalláu en daqué cosa misterioso.

-2-

El trabayu yera pa Markhius la única forma de rellacionase col mundu. De facelo d’esa forma que, (xulgaba pa sigo despeutivamente), dicíen los “otros” que yera lo normal. Pa Markhius lo normal yera la soberana llibertá que siempre tenía y que nun dependía de tar arrodiáu d’aquella xente que yeren los “otros”. Poro, compadecíalos daveres. Mientres ellos vivíen doliéndose por avieyar, afarando les ilusiones qu’una vez tovieren, curando ‘l mal de la infelicidá en que vivíen con inútiles cataplasmes d’espectáculos deportivos, televisión y la valera compañía d’otros, (tan valeros y sinsustancia como ellos mesmos), élli gloriaba llibre d’aquellos aforfugos.

El so despachu ocupaba un cachu de la segunda planta del edificiu de la empresa. Compartíala con un archivu y lo que paicía un almacén. Tenía mexaderu propiu y lo que podría dicise una pequeña cocina na que preparar daqué cuando se-y antoxaba.

Los díes colaben toos igual. Igual d’ocupaos. Igual de previsibles. Igual de... solitarios. Pero ‘l cinco de febreru d’aquel añu nun foi igual. Por primer vez deque entrare a trabayar na Corporación nun pudo mexar a gusto. Cuando fo pal bañu descubrió que l’escusadoriu encaboxare la tragadera y inundare de mierda ‘l sitiu. Noxáu, dió anuncia d’ello al departamentu d’iguadures. Noxáu, garró la botellina d’alcool de 96 graos que posaba en botiquín. Y noxáu empobinó pal serviciu d’aséu de la planta d’arriba que, como tolos de la empresa, yera mixto. Rezó pa nun atopase con naide en camín y, tovía más, prometió un sacrificiu abstrautu a dios comeniente si alcontraba ‘l bañu vacíu. Tuvo suerte. Afayolu al so petite.

Cuando posó les ñalgues en cagaderu, guapamente desinfectao y endilgao de papel hixénico, decatose de daqué no que nun arrecaldare primero: en suelu había lo que, de mano, paicía un pequeñu tableru d’axedrez. Confirmolo cuando axustó los antueyos. Taba asitiáu a la so derecha, xusto nel mediu d’un espaciu indefinible, al altor de la mediana del tabique que lu separtaría dafechu del cubículu vecín sinón fuera por aquella noxante idea de los diseñaores de baños de dexar descubiertos un par de palmos, perriba y per baxo, de la muria qu’unía los cagaderos pa facilitar la circulación del aire. Nun soportaba aquella perda d’intimidá. Pero ye que,amás, la cosa pa lo malo nun aparaba aende. Tamién cayó na cuenta de que nun llevare dalgo pa lleer de la que relaxaba l’esfínter. Prestába-y repasar notes del trabayu na intimidá del escusadoriu y eso agora nun yera posible. Pero, por embargu, tenía aquel tableru d’axedrez, nada estraordinario, que lu tentaba presentándo-y les pieces blanques pa entamar a xugar. Marcialmente asitiaes, esperaben una orde d’ataque.

“¿Por qué non?” pensó. Esgañó un cachu papel hixénico y protexíu pola celulosa empobinó pal pion de rei. Garrolu cuidosu, decatándose que taba magnetizao, y avanzolu hasta la cuarta casiella. Como nun había naide, dio la vuelta al tableru y contestose empatando’l movimientu. Otra vuelta y sacó ofensivu ‘l caballu del rei. Otra vuelta y el caballu contrariu aseguró la posición. Rendíu el cultu a la diosa Xea, consideró que nun yera tiempu de siguir caleciendo ‘l cagaderu desendolcando l’apertura española. Poro, llimpió ‘l culu y coló dexando en suelu lo que’n suelu taba.

-3-

Na oficina atopó un mensaxe nel “mésenyer” Acusaben recibu del asuntu del escusáu y pedíen-y paciencia porque, coyunturalmente, teníen problemes col equipu de mantenimientu y llimpieza. Aquello aseguraría-y otra visita al mesmu bañu d’enriba. Intolerable.

Espurrió na mesina qu’usaba, única y esclusivamente pa comer, un pequeñu mantel blancu curiando d’alinear les esquines coles marques qu’aseguraríen que la que caía a la so derecha siñalare l’esautu y cabal norte xeográficu. Mangó la merendera en mantel y sacó un platín con tortiella pataca y carne empano, too ello comercial, amás d’una bolsa plástico con cubiertos, tamíen, de plástico. Y agora tenía de... ¡La puta que lu parió! Tenía de llavar les manes y el so cuartu bañu fedía pa dar arcaes. Noxáu, otra vuelta, enfiló pal pisu d’enriba.

Enxabonóles bien y entamó a cuntar mentalmente les venti esfregaes d’automasuñu que-y aseguraríen una fonda, perfeuta y hixénica llimpieza d’epidermis manual. Na que cumplía la númbero selce decatose de que l’espeyu reflexaba en suelu daqué a les sos espaldes. Voltió la cabeza y vió el tableru d’axedrez. De la qu’ensuchaba les manes con greba toallina de papel reciclao averose al sitiu. Emburrió la puerta del cagaderu cola pierna y vió, con sorpresa, qu’había rempuesta al so últimu movimientu. Nun-y costó muncho calar les intenciones del anónimu collaciu de cagada. Recordaba una partía d’Alekhine que, con aquel movimientu, abría camín a traidor gámbitu de dama. “¡Ah, cabrón!” sorrió pa sigo y, darréu, esgayó un cachu papel hixénico del rollu encolingao na parea y situó ‘l so caballu de dama amañosamente. Nun aceutaría el regalu envelenáu que, ensin dulda, ufriría el misteriosu. El misteriosu cagón.

-4-

Otru día. Les mesmes prises p’atopar cai y carretera vacíes. P’atopar a los mesmos llagañosos vixilantes d’aquella sablera teunolóxico buxo y durmiyoso qu’ esperaben, too enfotao, el camude de turnu. P'atopar los mesmos códigos d’accesu. Los mesmos algoritmos de seguridá. El mesmu tranquilizaor silenciu. Pero lo primero yera lo primero. Naquellos intres, el dir mexar al pisu d’enriba ú, fortunosamente, atopó ‘l tableru d’axedrez respetáu pol serviciu de llimpieza qu’esperaba tamién toviere iguao el saneamientu del so cuartu bañu.

La rempuesta del misteriosu yera interesante al empar que decepcionante: nun aceutada la pieza ufiertada entamaba artificios pal enroque curtiu. Aquella defensa yera enforma previsible. Desilusinó. El misteriosu nun paicía tener altor de mires. Col ritu de garrar un cachín de papel, preparó l’artillería pa barrer el centru del tableru. Yera hora de que la dama, amás de calecer la cama del rei, s’amosara picardiosa al enemigu. Y coló.

A eso del meyudía xubió pa cumplir col organismu biolóxico. El so bañu yá taba llimpio, cierto, pero tenía mangao un cartelu de “fuera de serviciu” que, estrañamente, nun-y fadió ver. Esta vuelta el misteriosu nun paicía tener idees tan infantiles. Cierto que élli tenía ganao el centru pero non lo yera menos el que la defensa de les negres, paradóxicamente, asfisiaba a les blanques. La picardiosa dama, que moviere Markhius gasayosamente pa embizcar al contrariu nun paició impresionar al obiespu negru que, con sofitu d’artillería y pionada, carmenaba l’espaldar de la otra dama. “Al final va a ser un gallu” camentó pa sigo de la que movía el rei pa guardalu de lo qu’antemanaba diba ser una rempuesta pa poques bromes.

Enantes de colar pa casa xubió al bañu. Y xubió non por ganes de mexar sinón por ver cómo respondía ‘l misteriosu al que, pa qué lo negar y por esceición, nun-y disgustaría conocer depués de lluchar venti duros movimientos. Vio el tableru talo que lo dexare. “¿Rendiríase, ho?” camentó. La verdá ye que’l drama taba servío y les negres bien comprometíes.

-5-

Otru día en paraísu. La mesma rutina que, bramente, espeyaba felicidá. Too previsible y midío. Matemático. Esauto. Congruente. Los díes espurríen y amenorgaben en lluz o solombra de la que traíen agua o sol. La ruta siempre igual de solitario. La mesma solitú lliberaor. Los mesmos personaxes, y a comeniente distancia. Había un mes que nun toviere un episodiu de pánicu seriu. A la fin, la terapia de Nadjnne furrulaba. Depués de cuntar mentalmente los pasos dende l’ascensor a la puerta del despachu, mermuriando baxino aquél mantra protector que-y ensiñare la terapéuta, entró en cuartu y posó les curties alfayes téuniques qu’avezaba llevar al trabayu: una memoria “güesebé”, de munches xigues, y l’escalamochaor dixital de procesos imposibles, el caza-meruconos, como-y prestaba llamalu. Darréu d’ello cumplía dir al escusáu, a hixenase, pero agora yá nun emburriaba la puerta del so bañu priváu sinón qu’empobinaba los pasos al d’enriba. Ellí trescurría, con naturalidá, un drama absurdu.

Atopó el tableru cola rempuesta del misteriosu. El campu de batalla, pola situación na que taba, al bellume, ermaba en pieces y los muertos, quiciabes por piedá o venganción, esapaicíen de la vista de los xugaores. Abastaron-y cinco minutinos pa pescanciar que la cosa, de yá malo, podría dir a pior. Esta vuelta les negres atoparen el camín afayaízo (aquél que élli yá imaxinare dos movimientos enantes cuando, embulláu pola sobeya, imperdonablemente soberbiosu, cobró la dama que-y ufrió el desconocíu al facer lo que, de mano, paició-y clarísimu erru de ñuvatu). Vio l’acabación. Innminente. Inxusto. En tres tristayos intres. Un “¡Dios!” afogó en gargüelu. Cómo odiaba a la xente.

En despachu, arrodiáu peles cincu pantalles qu’espeyaben los procesos de depuración del programa “phy-4.26”, remembrábase, una y otra vuelta, d’aquella situación de muerte inminente. Dába-y vueltes al tableru. Percurría fileres, columnes, diagonales. Una tres otra, les diferentes combinaciones sucedíense en celebru a velocidá d’amoriu. “A bon mal, meyor igua” sorrió cuando acolumbró una posible solución que, nel pior de los casos, llevaría a les tables. Apuntó la combinación y dexó la tema pa siguir no que-y daba de comer.

Cuando-y vinieron les ganes de mexar alcordose de la partía. Y de la solución. Tiró pa enriba y sentó en cagaderu enguapao d’hixénico papel. Con sorrisa de trunfu y celulosa na manu, movió la torre en cata l’aforcamientu del rei prietu. Aquello obligaría a tres movimientos repetíos siguíos sinón afletaben primero les tables. Un “¡h.ódete, cabrón!” salió-y del alma.

Llevantó les posaderes y xubía el pantalón cuando oyó la puerta del serviciu abrir. Sintió sudu friu na frente. Yera la primer vez qu’entraba daquién deque visitaba aquél escusáu. Nun taba dispuesto a cruzase con naide. Nun necesitaba esa servidume. Abotonó la bragueta y posó otra vuelta les ñalgues vistíes na conca, esperando que colara l’aciclán primero. Mas, pa alloriu de Markhius, la persona metiose nel mechinal vecín. Xusto el que tenía la parte del tableru en que xugaben les negres. Con cierta familiaridá, vió zapatos de caballeru. Esgolifó, cuidosu, arume de colonia masculino de marca conocío. El pantalón baxao amosaba raya diplomático, neto que’l suyu. “Calcetinos negros, de lycra. De xuro qu’ hasta l’entamu el xinoyu” camentó mientres tenaba facer el menor ruíu posible.

-6-

De sotrucu, una manu entró nel curtiu campu visual qu’enarcaba el tableru. Espía, non como la suya, que necesitaba un cachu papel hixénico pa tocar y mover la pieza, aquélla fexo’l primer movimientu que prometía les tables. Plasmáu, Markhius nun sabía qué facer. El puntu, dulda ausente, sabía que taba ellí, asina qu’esperaba que’l vecín de mechinal, élli, Markhius Xostronu, contestara la xugada. Puesto que taba sentáu y afatáu podría colar yá, sin otru ruíu que’l de la descarga d’agua llimpiando ‘l cagaderu. Nun tenía obligación de siguir con aquello. Naide sabía que élli xugaba aquella partía. Pero nun podía negar qu’aquello-y prestaba. Como muncho diba a igualar, non perder. Aceptó ‘l retu pa tener d’enfretase a otru retu: dába-y aquello el que lu viera mover la pieza con mano protexía con papel hixénico. Arreblagando la revoltura que-y atoxigó con solo camentar en facelo, baxó la manu desprotexía y, tremosu, garró con cascanciu, y dos deos, la pieza blanco que pondría en xaque al rei prietu, nun dando-y otru escape que recular al sitiu que primero dexare. De la que posaba la pieza quinxo avisar el xaque, pero nun-y salió nada pela boca circunstancialmente ensucho.

Cuando diba a garrar la pieza paició-y oyer movimientu nel cuartín vecín pero nun-y dió importancia ya que tenía de concentrase en garrar la pieza y mangala nel sitiu correutu. Y fecho l’entamu d’esto últimu, cosa estraño, notó humedá na manu que posaba la pieza que daba anuncia del xaque. Un llíquidu caldiu caía d’arriba chiscándolo too. ¿¡Qué coño yera aquello!? Y la cosa siguió hasta que decatose del chorru mexu que-y ciescaba manu y tableru.

D’esmenu sintió fuéu na manu. En brazu. En coldu... Sintió cómo-y xubía amburante mordigañu de xabaz bestia, d’esmermillante ácidu. Un dolor invivible que-y españó en glayíu de coraxe. Y oyó una gran risa al otru lláu. Y una voz, estraña, que dicía, risondera y al altu la lleva, “¡La vida ye duro, amiguín!” Arrebatáu, emburrió montesín la chapa de diseñu que facía de puerta con arrevexu tan violentu qu’espetó la puñeta esterna de la puerta na vecina. Al salir vió nel espeyu asitiáu al frente que la puerta del desconocíu tamien abría y qu’aprucía la figura del gran cabrón que diba fostiar hasta l'alma.

Mas el movimientu de vengación que Markhius entamaré paró de trebolén cuando vió la cara d’aquél que lu ofendiere. Markhius atocheció dafechu al ver que con quien diba engardise yera daquién claváu a élli mesmu. Igual vestíu, igual pose... igual cara. ¡Yera élli mesmu!

En realidá Markhius nun vió más. El tratamientu de Nadjnne Fjor nun furrulare tan bien como esperaba. El so tarrecimientu pa colos otros fixere que yá solo atopare na vida a xente que yera élli mesmu. Podía llamase aquello retu pero, daveres, yera un problema. Un bon problema vital del que nun foi desengüertar. Morrió espantáu de sigo mesmu.

Pero más asuráu quedó ‘l vixilante. Nun esperaba atopar a aquél home, seriu y de tratu esguilón, xugando una partía d’axedrez solu y en suelu, nel retrete. Por mirar con curiosidá p’abaxo descuidó la puntería de la minga y emporcolo too. ¡Vaya mierda qu’entamare!

Costante Álvarez 16/02/2008